ԵՐԻՏԱՍԱՐԴԱԿԱՆ ԲԱՆԿ
Ծրագրի նպատակը`ապահովել երիտասարդների ակտիվ մասնակցությունը երկրի գյուղական համայնքների զարգացման գործում:
Երիտասարդների ավելի քան մեկ երրորդն ապրում է գյուղական համայնքներում: ՀՀ մշակույթի նախարարության կողմից անցկացված հետազոտության համաձայն, գյուղական համայնքներում բնակվող երիտասարդների հիմնախնդիրներն են մասնագիտական կրթություն ստանալը եւ զբաղվածությունը, ինչպես նաեւ մշակութային միջոցառումների բացակայությունը: Սոցիալ-տնտեսական դժվարությունները խոչընդոտում են երիտասարդների ակտիվ մասնակցությունը գյուղական համայնքների զարգացման գործում: Գյուղական համայնքների երիտասարդների գործնական հմտությունները եւ համայնքների զարգացման գործում ղեկավար դերեր ստանձնելու կարողությունները զարգացնելու նպատակով Եվրասիա համագործակցություն հիմնադրամը Հյուսիսային Իռլանդիայի համայնքային հիմնադրամի (CFNI) հետ համատեղ իրականացնում է “Երիտասարդական բանկ” ծրագիրը: Ծրագրով նախատեսվում է զարգացնել երիտասարդների մոտ առաջնորդության, որոշումներ կայացնելու եւ վերլուծական մտածելակերպի հմտություններ` ի շահ համայնքի խնդիրների լուծման:
Կարողությունների զարգացում
2007 թ. հունիս ամսին Եվրասիա համագործակցություն հիմնադրամը մեկնարկեց “Երիտասարդական բանկ” ծրագիրը եւ Հայաստանի գյուղական համայնքներում ձեւավորեց հինգ երիտասարդական բանկ-կոմիտեներ: Յուրաքանչյուր կոմիտեին անդամակցում են գյուղական համայնքներում բնակվող 16-24 տարեկան 5-7 երիտասարդներ: Երիտասարդների ընտրության հարցում հաշվի առնվեցին երիտասարդների` թիմային եւ կամավորական աշխատանքի կարողությունները: Երիտասարդների ընտրությունից հետո Հյուսիսային Իռլանդիայի համայնքային հիմնադրամի մասնագետներն անցկացրեցին քառօրյա աշխատանքային հանդիպումներ` նվիրվաած երիտասարդական բանկի աշխատանքների կազմակերպմանը: Հանդիպման ավարտից հետո երիտասարդական բանկերի անդամներն անցկացրեցին համայնքի կարիքների գնահատում: Գնահատման արդյունքների հիման վրա մշակվել են դրամաշնորհային ծրագրեր` ուղղված երիտասարդների միջոցով համայնքի խնդիրների լուծմանը: Մրցութային կարգով ծրագրերն ընտրելուց հետո երիտասարդական բանկերն անցկացնելու են ծրագրերի մոնիտորինգ: Այս գործողությունների եւ լրացուցիչ այլ դասընթացների միջոցով երիտասարդական բանկերը ձեռք են բերում գործնական գիտելիքներ թափանցիկ կառավարման վերաբերյալ` հետագայում իրենց աշխատավայրերում կամ համայնքներում կիրառելու նպատակով:
Համագործակցություն
Եվրասիա համագործակցություն հիմնադրամը խթանելու է երիտասարդական բանկերի միջեւ համագործակցության ցանցի ստեղծումը: Այն հնարավորություն կտա իրականացնելու տեղեկատվության ու փորձի փոխանակում ծրագրի մասնակիցների միջեւ: Հիմնադրամը նախատեսում է ստեղծել օնլայն համակարգ` երիտասարդական բանկերի միջեւ հաղորդակցությունն ապահովելու համար: Դասընթացների միջոցով կամրապնդվի նաեւ ցանցի անդամների միջեւ կապը: Կկազմակերպվի նաեւ համաժողով` նվիրված “Երիտասարդական բանկ” ծրագրի աշխատանքներին: Երիտասարդության հարցերով զբաղվող այլ կազմակերպություններ կհրավիրվեն մասնակցելու ծրագրի կայուն զարգացմանն ուղղված աշխատանքներին: Ապագայում Եվրասիա համագործակցություն հիմնադրամը հնարավորություն կընձեռի Հայաստանի երիտասարդական բանկերին իրականացնելու տեղեկատվության եւ փորձի փոխանակման աշխատանքներ Վրաստանի, Ադրբեջանի, ինչպես նաեւ օտարերկրյա այլ երիտասարդական բանկերի անդամների հետ:
Համապատասխան նյութ
Երիտասարդական բանկ (88.75 KBytes)
ԵԲ անդամակցելու դիմում (164.5 KBytes)Երիտասարդական բանկ կոմիտեների ցուցակը (69.92 KBytes)
«Զրույցներ Թուրքիայի մասին» Երևանում
Զրույցներ ժամանակակից Թուրքիայի մասին. Դասընթաց լրագրողների համար
Նախագծային գաղափարների ընդունում. Մասնակցության հրավեր
«Հայ-թուրքական հարաբերություններ» ռեպորտաժ-հարցազրույցների տեսանյութերի մրցույթ
